Half Year Meet nge Half Yearly Meet?- C. Lalrosanga

Posted by chuaungo on May 1, 2010 · 2 Comments 

Kan KTP hruaitute tawngkam tha ûmin leh ka rilrua ka pai dam hleih theih loh a nih avangin kan hruaituten midangte thurâwnte pawh laa Bial Committee-a an khel chhunzawmah tiin Challenger kal tlangin ngaihdan ka’n thawh leh pawp mai a nih hi!
Challenger leh Kei:
Kan sawi tum taka ka luh hmain tling lo taka kum 5 (1995-98 & 2003) lai Challenger Editor ka lo nih ve tawhna tanchhanin he chanchinbu hmasawn zelna atana rawtna leh ngaihtuah zui tur han chhawp chhuak hmasa ila. Computer kan hman hnu hian thil a insamkhai hleih tain information technology pawh a lo changtlun tak zel avangin chhuah tur thu leh hla khawn khawm pawh a awlsam ta sawt a, a layout leh design, a hmelhmang hrim hrim pawh hi mawi, nalh leh chhiar chakawm taka siam theih a ni tawh a, computer lam erawh hmelhriat thûk deuh a tul ang. Benga kan hriat aia kan thil hmuh hian thûk taka kan ngaihtuahna a lâk thin avangin kan thuchhuahte hi a theih anga tamin milem, thlalak, graphic chi hrang hrang hmanga thuam mawia tuaihnum ni ta se, chhiar leh thlir a hlawh leh zual ngei ang. Entirnan, Branch Committee thu leh hla kan chhuah pawhin digital camera leh mobile phone changkang tak tak kan neih fer fur hlawm tawh avangin meeting thlalak te pawh neih mai theih a ni ang. Article-te ngat phei hi chu a chawih tur milem nen thuam ni thei ngei se, ‘A picture worth many thousand words’ an ti a ni lawm ni kha? Text hrim hrim pawh hi ‘mit la’ leh nalh danglam tak, chhiar nuam tho si-a chei dan a awm ang; a kaida chu ‘innovative’ tura tan lak a ni e.
Kan thupui:
KTP ten Bial huapa intawhkhawm kan neih thin hi Half Yearly Meet kan ti thin a, Republic Biala kan awm lai khan Upper Republic-a Bial Conference kan neih tumin palai pakhatin ‘Yearly’ tih hian kum tina neih thin leh thleng thin a kâwk a, kum chanve intawhkhawm hi chu Bial Conference-a rel chawp, kum tina neih ngei ngei tura ngaih a nih lem loh avangin ‘Half Year Meet’ tih mai hi a dik zawk a ni ti zawngin a sawi a, ka pawmpui zân lo na a, ka sap tawng thiam chin atanga hnialfung han lek tur em chuan ka inthlahrung bawk si, midang tumahin an rawn hnial bawk si loh avangin a hma zawng zawnga Half Yearly Meet kan tih thin kha Half Year Meet tiin kan thlak ta a, Venghlui Biala Upper Republic leh keini kan han beh khan Bial hlui lama kan tih dan chhawm lutin anni pawhin Half Yearly Meet an lo tih ve ngar ngar thin kha Half Year Meet-ah kan thlaksak ta zel kha a ni a, vawiin thlenga ka la lem hleih theih loh avangin over fe tawh hnuah tihian ka han sawi hnawk leh ta hram chu a ni a, a nikhua loh thlak ang reng ngawt a ni.
Sap tawng zir ang:
‘Half’ hi noun a nih rualin adjective pawh a ni bawk a, ‘Half Year’ kan tih chuan ‘Year’ sawifiahtu atanah adjective angin kan hmang tihna a ni. Chutiang bawkin ‘Meet’ hi verb leh noun anga hman theih a nih ve ve rualin kum chanve intawhkhawm sawi nana kan hmannaah hi chuan noun angin kan hmang a, thumal pahnih inkawp ‘half year’ hmanga noun ‘Meet’ sawifiah turin ‘half year’ chu adjective anga hmangin Half Yearly Meet tih ni zawkah ka ngai a ni. Chutiangin ‘Yearly Meet’, ‘Yearly Total’, Half Yearly Total’ te pawh a hman theih zel ang. ‘ly’ a tel avanga kum tina hman, kum tina awm leh thleng tur anga ngaih kher tur a niin ka hre hlei thei lova, grammatical zawnga kan hman avanga ‘Yearly Meet’, ‘Half Yearly Meet’ ti kan ni zawk lawm ni tih hi vawiin thlenga ka ngaihdan chu a ni a, ‘Half Year Meet’ tih hi Mizo tawng kalphung ang chuan a dik chiah a, mahse sap tawng kalphung erawh a ni lovin ka hria. Ka sap tawng thiam dan erawh a limit em avangin hniak phawi hlek lova tan khawh erawh ka ngam bik chiah lo; sap tawng hre thuk zawkte ngaihdan hriat a châkawm.
Republic leh Venghlui Bial tih loh Bial dang zawng zawng deuh thaw hian Half Yearly Meet an la tih deuh vek zawk ka ring a; eng pawh nise, kha chen ka lo pai tawh, inchhak da thei tura kan hruaituten min cho phawk hi lawmawm ka ti a, over hnu hian rin aia lung a lên lutuk loh ang aiin KTP intihneitu erawh bansan a har dawn a nih hi. Khawi hmunah pawh KTP pun khawmnaah chuan ka intih mikhual theih ka ring lo.

Filed under KTP News